مرجعِ تقلید حضرت آیت اللہ العظمیٰ جعفر سبحانی نے ایک پیغام کے ذریعے رہبرِ معظم انقلاب اسلامی ایران حضرت آیت اللہ خامنہ ای (رضوان اللہ تعالیٰ علیہ) کی شہادت پر امامِ زمانہ (عج)، امتِ مسلمہ، علمائے اعلام اور مراجعِ عظام کو تعزیت پیش کی ہے۔

پیغام کا متن درج ذیل ہے:

بسم اللہ الرّحمٰن الرّحیم

إِنّا لِلّهِ وَإِنّا إِلَیهِ راجِعُونَ

«إِنَّمَا الحَیاةُ عَقیدَةٌ وَجِهاد»

جمہوریہ اسلامی ایران کے رہبر حضرت آیت اللہ خامنہ ای (قدس سرہ) کی مظلومانہ شہادت، اور ان کے ساتھ سپاہ (IRGC) و فوج کے کمانڈروں کی شہادت نیز متعدد ہم وطنوں، بالخصوص بے دفاع خواتین اور بچوں کے قتلِ عام کی خبر نے امتِ مسلمہ اور خاص طور پر ایران کی شریف قوم میں رنج و غم کی لہر دوڑا دی ہے۔

میں اس المناک اور تکلیف دہ حادثے پر حضرت ولیِ عصر (عج)، تمام امتِ مسلمہ، علمائے کرام، مراجعِ عظام اور بالخصوص شہداء کے معزز خاندانوں کو تعزیت پیش کرتا ہوں اور بارگاہِ الٰہی سے ان کے لیے بلندیِ درجات اور رحمتِ واسعہ کا طلب گار ہوں۔

حضرت آیت اللہ خامنہ ای اس کلام کا سچا مصداق تھے کہ “زندگی صرف عقیدہ اور جہاد کا نام ہے”؛ انہوں نے اپنی جوانی سے لے کر اپنی مبارک زندگی کے آخری لمحات تک، اپنے قلم، بیان، جان اور دل کے ساتھ اسلامی تعلیمات کی وضاحت اور ملک کی حکیمانہ قیادت کے لیے کوششیں کیں، یہاں تک کہ ماہِ مبارک رمضان میں شہادت کے عظیم مرتبے پر فائز ہو کر اپنے جدِ بزرگوار، مولائے متقیان امام علی علیہ السلام کے مہمان بن گئے۔

ہم اللہ تعالیٰ سے دعا گو ہیں کہ ان مظلوموں کے پاک خون کو رائیگاں نہ جانے دے اور ان کا انتقام ان خبیث، منحوس اور درندہ صفت دشمنوں سے لے، اور ملتِ ایران سے ہماری درخواست ہے کہ وہ اپنے اتحاد اور وحدتِ کلمہ کو برقرار رکھیں۔ اللہ تعالیٰ اس ملک اور اس نظام کا محافظ ہے۔

والسَّلامُ عَلَیکم وَرَحمَةُ اللهِ وَبَرَکاتُهُ