تیل کے طوفان میں پاکستانی آزمائش

خلیج کی تاریخ بے پناہ دولت، تزویراتی کشمکش اور بار بار بھڑک اٹھنے والے تنازعات سے عبارت ہے۔ مگر اس خطے میں اٹھنے والی جنگوں اور بحرانوں کی گونج کبھی اس کی سرحدوں تک محدود نہیں رہی۔ جب بھی کسی تنازع کے باعث تیل کی پیداوار متاثر ہونے یا سمندری راستوں کی سلامتی خطرے میں پڑنے کا اندیشہ پیدا ہوتا ہے، اس کے اثرات دنیا کے دور دراز خطوں تک پھیل جاتے ہیں۔ قیمتیں بڑھنے لگتی ہیں، رسد غیر یقینی کا شکار ہوتی ہے اور میدانِ جنگ سے کوسوں دور معیشتوں کو بھی اس بحران کی قیمت ادا کرنا پڑتی ہے۔پاکستان بھی بارہا اس صورتِ حال کے اثرات سے دوچار ہوا ہے۔ اگرچہ جغرافیائی اعتبار سے پاکستان خلیج سے نسبتا دور ہے، لیکن اس کی معیشت درآمدی تیل اور گیس پر گہرا انحصار رکھتی ہے۔ دوسری جانب خلیجی ممالک میں روزگار حاصل کرنے والے لاکھوں پاکستانی وطنِ عزیز کو ترسیلاتِ زر بھیجتے ہیں، جو ملک کے لیے زرِ مبادلہ کا ایک نہایت اہم ذریعہ ہیں۔ چنانچہ خطے میں پیدا ہونے والا ہر بڑا بحران پاکستان کے لیے بیک وقت دو باہم جڑے ہوئے چیلنج لے کر آتا ہے: توانائی کی بڑھتی ہوئی قیمتیں اور ترسیلاتِ زر کے متاثر ہونے کا خطرہ۔1980ء میں شروع ہونے والی ایران، عراق جنگ نے پاکستان کی اس کمزوری کی ابتدائی اور واضح تصویر پیش کی۔ ایران اور عراق دونوں بڑے تیل پیدا کرنے والے ممالک تھے، لیکن جنگ نے ان کی پیداواری اور برآمدی تنصیبات کو شدید نقصان پہنچایا، جس کے نتیجے میں عالمی منڈی میں تیل کی رسد کم ہوئی اور قیمتوں میں اضافہ ہوا۔ جنرل ضیا الحق کے دور میں پاکستان نے حقیقت پسندانہ سفارت کاری کا مظاہرہ کرتے ہوئے ایران اور عرب خلیجی ریاستوں، دونوں کے ساتھ عملی تعلقات برقرار رکھے، جبکہ سعودی عرب کے ساتھ اپنے تزویراتی تعلقات کو بھی مزید مستحکم کیا۔
تیل کی بلند قیمتوں نے پاکستان کے درآمدی بل پر خاصا دبائو ڈالا، بالخصوص اس لیے کہ ملک میں تیل صاف کرنے کی صلاحیت محدود تھی۔ تاہم خلیجی ممالک میں مقیم پاکستانی کارکنوں کی ترسیلاتِ زر میں تیز رفتار اضافے نے معیشت کو ایک اہم سہارا فراہم کیا۔ 1980 ء کی دہائی کے آغاز تک ترسیلاتِ زر زرِ مبادلہ کا ایک بڑا ذریعہ بن چکی تھیں، جنہوں نے تجارتی خسارے کی مالی معاونت اور ملکی طلب کو برقرار رکھنے میں اہم کردار ادا کیا۔ پاکستان نے سعودی عرب کے ساتھ تزویراتی تعاون بھی جاری رکھا اور ساتھ ہی ایران کے ساتھ اپنے اقتصادی روابط کو بھی برقرار رکھا۔اس بحران نے پاکستان کو یہ سبق دیا کہ سفارتی لچک اور بیرونِ ملک پاکستانیوں کی ترسیلاتِ زر کس قدر اہم ہیں، لیکن اس کے ساتھ ہی ایک بنیادی کمزوری بھی آشکار ہوئی: پاکستان توانائی کی ضروریات پوری کرنے کے لیے درآمدات پر حد درجہ انحصار کرتا ہے۔ایک دہائی بعد اگست 1990 میں عراق کا کویت پر حملہ پاکستان کے لیے اس سے بھی زیادہ سنگین آزمائش بن کر سامنے آیا۔ عالمی منڈی سے عراقی اور کویتی تیل کی برآمدات تقریبا غائب ہو جانے کے باعث خام تیل کی قیمتیں تیزی سے بڑھ گئیں۔ پاکستان اس بحران سے خصوصی طور پر متاثر ہوا کیونکہ کویت اس کے لیے پٹرولیم مصنوعات کا ایک اہم فراہم کنندہ تھا۔اسلام آباد کو سعودی عرب، ایران، ملائیشیا اور دیگر ممالک سے متبادل ذرائع سے تیل حاصل کرنے کی کوشش کرنا پڑی۔ تیل کا درآمدی بل نمایاں طور پر بڑھ گیا، زرِ مبادلہ کے ذخائر شدید دبائو میں آگئے اور کویت سے آنے والی ترسیلاتِ زر بھی متاثر ہوئیں۔ اگرچہ بعد ازاں خلیج کی دیگر ریاستوں نے اس نقصان کے بڑے حصے کی تلافی میں مدد فراہم کی، لیکن اس بحران نے یہ حقیقت پوری شدت سے واضح کردی کہ خلیج میں رونما ہونے والے واقعات کتنی تیزی سے پاکستان کے لیے معاشی ہنگامی صورتِ حال اختیار کرسکتے ہیں۔
حکومت نے ابتدا میں یہ کوشش کی کہ عالمی منڈی میں تیل کی قیمتوں میں اضافے کا مکمل بوجھ ملکی صارفین پر منتقل نہ کیا جائے، لیکن اس پالیسی کے نتیجے میں قومی خزانے پر دبائو بڑھتا گیا۔ ہنگامی بنیادوں پر تیل کی خریداری، قلیل مدتی مالی انتظامات، سفارتی کوششیں اور ادائیگیوں میں سہولت جیسے اقدامات ناگزیر ہوگئے۔ بالآخر جنگ کے خاتمے اور تیل کی قیمتوں میں کمی نے کچھ سکون فراہم کیا، لیکن بنیادی حقیقت اپنی جگہ برقرار رہی۔